ភ្នំពេញ៖ ក្រសួងអប់រំ យុវជន និងកីឡា បានសម្រេចផ្លាស់ប្ដូរកាលបរិច្ឆេទប្រកាសលទ្ធផលប្រឡងសញ្ញាបត្រមធ្យមសិក្សាទុតិយភូមិ សម្រាប់រាជធានីភ្នំពេញ និងខេត្តកណ្តាល មកនៅត្រឹមថ្ងៃទី១៤ ខែមករា ឆ្នាំ២០២២ នាម៉ោង ៣រសៀល និងតាមបណ្តាខេត្តផ្សេងទៀត នាវេលាព្រឹកថ្ងៃទី១៥ ខែមករា ឆ្នាំ២០២២។
យើងនៅមិនទាន់ដឹងពីមូលហេតុនៃការប្ដូរថ្ងៃប្រកាសនេះនៅឡើយទេ ខណៈតាមកាលបរិច្ឆេទលើកមុនគឺគ្រោងនឹងប្រកាសនៅថ្ងៃទី១៨ និង១៩ ខែមករា ឆ្នាំ២០២២។
ផ្អែកតាមសេចក្តីប្រកាសព័ត៌មានរចុះថ្ងៃទី១៣ ខែមករា ឆ្នាំ២០២២ ក្រសួងអប់រំ យុវជន និងកីឡា បានបញ្ជាក់ថាមន្ទីរអប់រំតាមបណ្តារាជធានី ខេត្តត្រូវចាត់តំណាងឱ្យមកទទួលបញ្ជីប្រកាសលទ្ធផលប្រឡងនៅតាមមណ្ឌលសំណេរក្នុងរាជធានី ខេត្ត ដើម្បីយកទៅបិទផ្សាយតាមមណ្ឌលនីមួយៗ ទៅតាមពេលវេលា និងកាលបរិច្ឆេទដែលបានកំណត់រួចមកហើយ។
ចំពោះការបើកកញ្ចប់បញ្ជីប្រកាសលទ្ធផលប្រឡងតាមមណ្ឌលនីមួយៗត្រូវមានការចូលរួមពីនាយក នាយិកាគ្រឹះស្ថានសិក្សាជាមណ្ឌលប្រឡង តំណាងការរិយាល័យអប់រំ យុវជន និងកីឡានៃរដ្ឋបាលក្រុង ស្រុក ខណ្ឌដែលមានមណ្ឌលប្រឡង និងតំណាងអជ្ញាធរដែនដីផងដែរ។
បន្ថែមលើនេះការប្រកាសលទ្ធផលប្រឡងបាក់ឌុបនេះក៏ត្រូវភ្ជាប់នឹងរបាយការណ៍ផ្ញើរមកនាយកដ្ឋានកិច្ចការប្រឡងវិញ តាមរយៈបណ្តាញទំនាក់ទំនងសង្គមតេឡេក្រាម បញ្ជាក់អំពីស្ថានភាពកញ្ចប់ដាក់លទ្ធផលប្រឡង និងការវាយត្រារបស់នាយកដ្ឋានកិច្ចការប្រឡង ព្រមទាំងពេលវេលាបើកកញ្ចប់ដាក់លទ្ធផលប្រឡងជាដើម។
ការប្រឡងសញ្ញាបត្រមធ្យមសិក្សាទុតិយភូមិឆ្នាំសិក្សា២០២០-២០២១ ប្រព្រឹត្តិទៅនៅថ្ងៃទី២៧ ខែធ្នូ ឆ្នាំ២០២១ រហូតដល់ថ្ងៃទី២៨ ខែធ្នូ ឆ្នាំ២០២១ ដែលមានបេក្ខជនប្រឡងចំនួន ១១៤ ១៨៥នាក់ ក្នុងនោះស្រីមានចំនួន ៦០ ៣៩៧នាក់៕
